"تجنب التلامس" من القواعد الأساسية والمهمة والحساسة في صناعة الأغذية والمشروبات و ده بيكون تجنباً لحدوث التلوث العرضي

و طبعاً استخدام مقياس الحرارة (الترمومتر) ضروري جداً في الصناعة ولا غنى عنه وده بسبب وجود معاملات حرارية في معظم نقط ومراحل الإنتاج زي:
البسترة
التسخين
التبخير
التبريد
التجميد
وغيرهم كتير, فبالتالي ما ينفعش ما تستخدمش ترمومتر

ومن هنا ظهرت أنواع جديدة من الترمومترات تقيس من غير الحاجه لحدوث التلامس بين جسم الترمومتر والغذاء أو المشروب اللي بنصنعه, وهي ترمومترات بتعتمد على تقنية الإنفراريد Infrared أو اللي بيطلقوا عليها الترمومترات الليزر,

في البداية ظهر نوع واحد أو اتنين وبعد كده بقا في شركات كتير جداً بتقوم بتصنيع الترمومتر ده, والسوق بقا مليان أنواع تتوه فيها من كترها وتنوعها
بالقياس على نفس نظرية موبايل نوكيا زمان نقدر نقول إن Testo كان أفضل ترمومتر ممكن تستخدمه بس طبعاً هو غالي, والحقيقة هو منتج قوي وحمار شغل وده لأنه ألماني, بس طبعاً ظهر أنواع كتير بعد كده بتقوم بنفس الوظيفة مع مميزات أخرى أكتر وبسعر أقل زي:

EtekCity
Fluke
DrMeter
EnnoLogic
Taylor
Cuisinart
Dewalt 
ThermoWorks
MilWaukee
RunnerUp
ThermalPredator
BTMeter
Klein
Lemsa
Estink
Sovarcate
Raytek
TackLife
Masione
Anggo
HoldPeak

جوه كل براند Brand أو اسم من المذكورين دول هاتلاقي موديلات كتير, محتاج تختار منهم الأنسب لشغلك واللى في حدود ميزانيتك

مهم كمان وإنت بتختار إنك تراعي كذا نقطة مهمة زي:

- مدى القياس أو رينج القراية: مهم يكون مناسب لصناعتك, يعني لو شغال في التجميد والتبريد يبقا محتاج حاجه تقرالك أقل من -18 س, ويفضل يكون الحد الأدنى للقياس (بتاع الترمومتر)أقل من الحد الأدنى للقياس (في مصنعك) علشان الدقة, وكذلك للحد الأقصى ممفروض يكون أكبر من القرايات الممكنة في صناعتك

- Adjustable Emissivity و ده عبارة عن رقم قابل لتعديل قيمته ف أي وقت  لضبط الحساسية (لو لقينا إن في فرق في القراية) ومايكونش الرقم ده ثابت

- Water Resistant لو أمكن يكون ضد المايه وضد الرطوبة يبقا أوبشن ممتاز علشان دقة القراية تفضل أحسن حاجه

- بطاريات قابلة للشحن: بدل ما تصرف تاني على تغيير البطاريات يفضل تختار نوع ملحق معاه بطارية أو اتنين من اللي بيتعاد شحنهم

- الضمان يكون سنة ع الأقل موش 3 شهور بس

- اختار شاشة أكبر لوضوح البيانات ومضيئة لسهولة استخدامها في الليل أو الأماكن اللي إضائتها ضعيفة

- أزرار أكتر يعني تحكم أكتر وأسهل

آخر تحديث للموضوع: 12 يوليو 2020